आनंदीबाई ओक यांचे माहेर

  • December 25, 2019
  • By Shantanu Paranjape
  • 7 Comments


   पेशवे घराण्यातील गाजलेल्या स्त्रियांपैकी आनंदीबाई या एक. पेशवे दप्तरातील कागदपत्रे या गो. स. सरदेसाई यांनी निवडलेल्या मोडी कागदपत्रांच्या एक खंडात आनंदीबाई यांच्या बद्दलची अनेक कागदपत्रे छापली आहेत. ‘आनंदीबाई यांची दिनचर्या’ अशा नावाने तो खंड आहे. त्याच्या प्रस्तावनेत संपादक म्हणतात की, ‘ऐतिहासिक गोष्टींच्याबद्दल असलेल्या रूढ समजुती व काढलेले निष्कर्ष यांचा खरे खोटेपणा पडताळून पाहण्यास अस्सल कागदपत्रांचा उपोयग होतो हे आनंदीबाई यांच्या बाबतीत विशेष महत्वाचे ठरते.

आनंदीबाई यांचे माहेर हे ओकांचे. म्हणजे आजवर आनंदीबाई यांच्याबद्दल जे लेख लिहिले गेले त्यात सरसकटपणे आनंदीबाई या गुहागर येथील ओकांच्या असेच लिहिले गेले परंतु हे ओक घराणे खुद्द गुहागरचे नसून गुहागर जवळील मळण गावातील होय. हे गाव गुहागर पासून २० किमी अंतरावर आहे व सध्याच्या गुहागर तालुक्यात मोडते. आनंदीबाई यांची दिनचर्या, सयाजी ज्ञानमालेने प्रसिद्ध केलेले आनंदीबी यांचे चरित्र किंवा गो. स. सरदेसाई यांनी छापलेल्या ‘ऐतिहासिक व्यक्तींच्या वंशावळी’ या पुस्तकात सुद्धा आनंदीबाई या गुहागर येथील असल्याचे सांगितले आहे. परंतु ज्ञानकोशात मात्र आनंदीबाई या मळणकर ओक यांची कन्या असे दिले आहे. खरे तर सर्व ओक हे गुहागर जवळ असणाऱ्या पालशेत गावचे, पुढे एका कुटुंबाला पालशेत गावची देशमुखी मिळाली आणि सरंजाम म्हणून आठ गावे दिली गेली. त्यात मळण हे गाव होते. पालशेत येथून या आठ गावात ओकांची कुटुंबे गेली.

वंशावळीत लिहिल्याप्रमाणे राघो महादेव हे आनंदीबाई यांचे वडील. राघो महादेव हे कारकून, शिलेदार  होते त्यामुळे बहुतांश वेळा ते घाटावर असत. राघो महादेव यांना नारोपंत नावाचा एक मुलगा होता. भा. इ. स. मंडळाच्या त्रैमासिकात छापल्या गेलेल्या श्री. पां. न. पटवर्धन यांच्या ‘कित्येक नवे शोध’ या लेखात ‘रघुनाथराव ओक यांना औरस मुलगा नव्हता म्हणून त्यानी बाबुराव यांना दत्तक घेतले’ हे विधान सर्वस्वी गैर आहे. सरदेसाई यांनी छापलेल्या वंशावळीत आनंदीबाई यांच्या भावाचे नाव हे गणपतराव असे दिले आहे. परंतु या नावाचा पुढे काही पाठपुरावा नाही असे ‘ओक घराण्याचा इतिहास’ या पुस्तकात दिले आहे. आनंदीबाई यांना एक दत्तक बंधू होता यावर सर्वांचे एक मत आहे. फक्त आनंदीबाई यांच्या सक्ख्या भावाचे नाव काय यावर अनेकांची मते वेगळी आहेत. 

नासिक येथील तीर्थोपाध्याय यांचाकडे असलेल्या माहितीनुसार राघो महादेव यांना नारोपंत आणि गोपाळराव असे दोन औरस मुलगे होते. परंतु हा गोपाळ नाव असलेला बंधू कदाचित लहान वयात वारला असावा कारण पेशवे दप्तरातील कागदपत्रे च्या चौथ्या खंडात आनंदीबाई यांनी भाऊबीजेसाठी आपल्या भावांना आणण्यास कोपरगावाहून माणसे व पोशाख धाडले. तसेच भाऊबीजेला नारोपंत आणि नासिक येथील एक चुलता असे आले असे उल्लेख मिळतो. यात गोपाळराव तसेच दत्तक बंधू बापूराव यांचा कुठेही उल्लेख मिळत नाही. त्यामुळे राघो महादेव हे आनंदीबाई यांचे वडील. पुढे त्यांना तीन औरस मुले. आनंदीबाई, गोपाळराव आणि नारोपंत. त्यातील गोपाळराव हे लहानपणी वारले असावेत पुढे नारोपंत सुद्धा फार जगू न शकल्याने घराणे चालू राहावे यासाठी म्हणून बाबुराव या आपल्याच घराण्यातील चुलत्याला राघो महादेव यांनी दत्तक घेतले असे समजते. ही सर्व नाती समजावीत म्हणून खाली वंशावळ देत आहे.

आनंदीबाई पुढे यांनी आपल्या दत्तक भावासाठी म्हणून काही इनाम मिळवून दिले. ते अगदी इनाम कमिशन पर्यंत चालू होते. पुढे इंग्रजांच्या आमदानीत त्यांना पेन्शन मिळू लागले. बाबुराव ओक यांची मुले पुढे बरीच भांडकुदळ निघाली. यामुळे घराण्याचे फार नुकसान झाले. या या बापूंचा मोठा चिरंजीव माधवराव ओक हे सन १९१४ पर्यंत हयात होते. माधवरावांचा मुलगा विनायकराव यांनी पुढे पुण्याच्या न्यू इंग्लिश स्कूल मध्ये चित्रकला शिकवत असत. ते सन १९११ मध्ये वारले. यांना दोन मुले. पैकी विश्वनाथ विनायकराव हे मुंबईत वकील होते. बापूराव ओक यांची आई म्हणजे काकूबाई ओक अर्थात आनंदीबाई पेशवे यांची आई. त्यांना सालिना ५००० रुपये मिळत असत. अर्थातच बाबुराव ओक हे आनंदीबाई यांच्यावर अवलंबून होते असे नाही. आनंदीबाई ओक यांच्या माहेरची फारशी माहिती कुठे दिलेली आढळून येत नाही म्हणून ती इथे देण्याचा हा एक प्रयत्न.

संदर्भ – १. ओक घराण्याचा इतिहास – श्री. भ. प्र. ओक.
       २. त्रैमासिक वर्ष ४ अंक १-४ कित्येक नवे शोध हा पटवर्धन यांचा लेख  
       ३. ऐतिहासिक व्यक्तींची वंशावळ - गो. स. सरदेसाई
       ४. पेशवे दप्तरातून निवडलेले कागद खंड ४ – गो. स. सरदेसाई 


© 2018, Shantanu Paranjape

_____________________________________________________________________________________

नक्की वाचा - 

विमानांचा शोध लागल्यावर त्या गड किल्ल्यांचे महत्व संपलेले असले तरी इतिहासाच्या दृष्टीने ती आपली स्मारके आहेत आणि त्यांची जपणूक करणे हे अत्यंत महत्वाचे आहे. जपणूक करण्याआधी त्यांचा इतिहास समजून घेणे हे आवश्यक आहे. त्यांचे प्रयोजन काय हे विविध ऐतिहासिक साधनांच्यामधून आपल्याला समजून येते. मात्र ही साधने सर्वांनाच वाचणे शक्य होत नाही त्यामुळेच आम्ही आमच्या संस्थेच्या वतीने घेऊन आलो आहोत ५ दिवसांचा दुर्ग ऑनलाईन दुर्अगभ्यास वर्ग. 

हा दुर्ग अभ्यास वर्ग घेणार आहेत डॉ. सचिन जोशी. सचिन जोशी यांनी महाराष्ट्रातील किल्ल्यांवर PHD केली आहे तसेच त्यांनी काही अंधारात असलेल्या किल्ल्यांचा शोध सुद्धा लावलेला आहे. त्यामुळे त्यांच्या नजरेतून किल्ले समजून घेणे हे महाराष्ट्रातील इतिहासप्रेमींच्यासाठी पर्वणीच आहे. हा अभ्यास वर्ग दिनांक १० ऑगस्ट ते १४ ऑगस्ट असा होईल. याची वेळ संध्याकाळी ७.३० ते ९ अशी असेल. यात तुम्हाला जोशी सरांना प्रश्न देखील विचारता येतील. यासाठीचे शुल्क हे रुपये ५०० आहे

इच्छुक असलेल्या सर्वांनी ८७९३१६१०२८ किंवा ७०२०४०२४४६ या क्रमांकावर Whats app वर संपर्क करावा आणि आपली सीट लवकरात लवकरत बुक करावी. कारण जागा या मर्यादित आहेत आणि अशा संधी पुन्हा पुन्हा येत नाहीत आणि हो जे नाव नोंदणी करतील त्यांच्यासाठी आमच्या इतिहासाच्या शाळेची एक महिन्याची मेम्बरशीप मोफत आहे.  

x

You Might Also Like

7 comments

  1. उत्कृष्ट माहिती शंतनुजी....

    ReplyDelete
  2. The information is good. I want to know how and when she died? What happened to her etc.

    ReplyDelete
  3. आनंदीबाई यांच्या माहेरचे घर दर्शविणाऱ्या फलकचा वेध घेत आम्ही गुहागरजवळ डिसेंबर २०१५ मध्ये भेट दिली होती. तिथे एक पडिक विहीर शिल्लक आहे/होती. मूळ घराचे कोणतेही लवलेश नाहीत. आनंदीबाई घराजवळील एका मंदिरात दर्शनाला जात असत, हा उल्लेख पाहून आम्ही देखील तिथे गेलो होतो. तिथे पाणी व्यवस्थापनाचा उत्कृष्ठ नमूना पाहायला मिळाला. तो आवर्जून पाहण्यासारखा आहे.

    ReplyDelete
  4. Ata ka karayacha hey vachun?

    ReplyDelete

$(document).ready(function(){ $('#mscontent').css('opacity','0'); });